سلفادور دالي

برسم روحي بفرشة زيت
ندهتني البنت انا قلت يا ريت
الرمش جرحني و روحت ما جيت
لا ركبت القطر ولا استنيت

صحفي في جرنان الحلم نادالي
لابس عينه و لابس رسمي
كابس على نفسي و على رسمي
اول ما سألني
..
سألني في اسمي

-اجابته كانت ظاهره ف بالي
بصوتي العالي جاوبت انا دالي

ايوة يا حاج ما تستغربشي
الحق بعيد و ما تستقربشي
باشرب خروب و شعير ما اشربشي
ببني بطيني و حجري و دبشي
جنب برج حمامنا الطاير
خليه نحل و دوم و فطاير
النكته الواد خدها ع الطاير
مزقت شبكه جوننا البالي
ضحكت معاها بكيت على حالي
ساعتها عرفت ندايا الحالي

اخوك الفقير

سلفادور دالي

عصفور القفص

عصفور ملون يزقزق في قفص في بلكونة في السيدة زينب

يحلم بأهله في اوغندا
يحلم بعشه المكركب
يحلم بعشه في رواندا
..
كان لقمة عيش

و مركب

فايحن..

و يئن..

و يتكسر

و حديد القفص
برضه
..
م البعد يتكسر

بار- مان

باكنس غطيان البيرة
ولا عمري دقتها
و حكولي عن دنيا اميرة
عمري ما عشتها
و اسمع شعراء السيره
ولا عمري فهمتها

ارمي الغناوي تقاوي

ورا كل عازف شيخ امام
عيسى امام المدبوحين
و العطشانين
و القلوب المليانين حنين
اليه
,,,
يا شيخ امام كتبت شعر كتير
بس نسيتك
انا اسف
،،
بس افتكر


ان انا اللي عاش جوايا صوت صمتك




فنزفت دمعه حزن









و التانيه غنوايتك

ليلة العيد الماضي

كان عندي برواز خشب قديم
يمكن من ايام جدي

كان ,فيه صورتي من خمس سنين
,ايام الفرحة الأخيرة
..


انهاردة جيت اشيله
عشان اعلق بداله فانوس رمضان


..
وقع انكسر
..

لقيت وراة صوري
لوح تشبه ورق الكوتشينه
بس عددهم سبعه
..
فريتهم في اللحظة
..
شفت الشخابيط
..
شفت واحد ماشي يتعب نفسه
..
شفت واحد يضحك
..
واحد يبكي
..
و واحد شايل همه في جفنه





واحد ماسك ورق الكوتشينه بيتفرج عالباقيين
..
كان الفايق في الغافلين
..
كان القاسي ع المساكين
..



كان شطين.. و البحر
كان حرفين
فـ أخر السطر
و السطر في جملة
في عمر الأيام
و الأعوام
في الحيا
و الموت

كان الميت و العايش
في حلمه






كان الرزين
و الطايش
..






ليلة العيد الماضي
مع فانوس رمضان مكسور
شبهه
.

سريالية الكتمان

مشيت كتيرساكت
ظاهريا
لكن
بئن من الضجيج الداخلي
..خطوط فوضوية
فـ نغم
فـ كلام
و باب كادر الفوتغرافيا
قافل
على معاني الوحدة
و العزلة
و الخزيان..
كنت انا المسجون
جدران السجن
السجان
غرقت فـ سريالية م الصمت
و الكتمان..
حاربت ذكرياتي مع طواحين الهوا
حاولت أقتل الماضي
بخنجر مغموس بالدوا
استمرت الحرب
يوم
اتنين
سنين.
.عدوا هوا
ثم ظهر السؤال
فين الأمل
و النور
و الشجر
و الناس
و الكلام
و الونس
و الدفا
و النبض
و الحياة
و فيني انا؟

نطق الجماد

صحيت لقيت البيت غريب
..و لون السما ازرق
رمادي كئيب
و الغيطان مش زي ما كانت قبل السفر
قبل ما يبقى الوقت بيعدي من بعيد لبعيد
جايز ابعد م القمر
..ساعتها
ما كانش قدامي غير اني ادور على ونيس
جوا الفضا
و الونيس مش شرط بنى أدم
حتة مزيكا..تنفع
ورقه فاضية اشخبط فيها..جايز
ولا صفحتين في كتاب مش م الكدابين
..أخر ما زهقت
..كلمت نفسي
ما سمعتنيش
سرحت في الأحلام
مع ذكريات عمر مضى
لقيتني شارد ما بين جدران و شباك
و شيش
و صور كتير و سطور أكتر
ما بتنقريشو اسفلت شوارعنا المغسولة بالمطر
لمعت في عيني
و قشعرني احساس البرد في اغسطس
و افتكرت اجازة الصيف
و حوش بيتنا اللي اتهرى لعب كورة
من ميت الف فوره و فوره
..سرحت كتير
..إلى ان نطق الجماد
ملامح او سمات
وصف الصورة و الضجيج و السكات
و اتكلم كتير
عن مشاعر ربانية
و الحكمة في وجود الانسانية
و المعاني اللي اتشكلت عبر الزمن
و اتراكمت زي الجبال م الرمل
..نطق الجماد
و اللي الحياة جواه
سكت
ما وصفش حتى عود كبريت خشب.

الحيرة

الحيرة قتلتني..و خلتني
اغوص في قلب السر

قلب الكون
..
مش الحكمة اللي قتلتني

برج الميزان

في اكتوبر من كل عام
بتصلب ع البرج دايما

و احيانا ً
ع الميزان

بيتسرسب العمر البسيط
ما بين النظرة و التأمل
ما بين الفطرة و التجمل
ما بين الرؤيا و الأحلام

احلام الزمن الغريب
الزمن اللي بيدفعك للشجن
ببساطة
اللي بيجرجرك للسيرك
مهرج
خبير في العباطة

و يعمل فيها ناصح فيسألك عن عمرك؟
تقول عن العمر
- قليل
رغم ان الحياه مافهاش اكتر من الأيام

و رغم ان في اكتوبر من كل عام

بتصلب ع البرج دايما

و احيانا ً
ع الميزان

بعد الغياب

بعد سنين م الفضفضة
و الطبطبة
و كلام عن الرضا
..
لقيت الفضا ضيق
و سمعت باب القلب
زيق
لما جيت افتحه
بعد الغياب

فتح بيبان الحلم تدايق

العقل فيه حاجات كتير مش ع اللسان
بس كل اللي في القلب
ع اللسان
ازرع امان في القلب
تلقى العقل متخانق
و ازرع حنان في العين
تلقى القلب مش فايق
فتح بيبان الحلم
..
تدايق

انا المسطول و انا الفايق
انا المرشوق
بسهم الوعد بالمعروف
بكعب الخلق لما يطوف
بليل ملهوف
و نيل عايق
و نخلة و طالع الشجرة
و انا اللي طالع الشجرة
و انا اللي طالع الغنوة
في يوم ما شفته بعد ما راح
انا الراوي و انا المصباح
انا ساكت
بعيد
لماح
لصوت الخطوة في الفكرة
لصوت مفتاح
على باب الجديد
بكرة
لصوت بسماح
كما صوت الأنين في قانون شهبندر ألجمال
انا اناشيد في ليل مع طمى مع موال
انا حمال
و مشربية
و جمل
..
والجمل قد التقل في الأحمال
انا ثابت على رجلي
انا صليت قديم فجري
انا ارابيسك مع نوال
انا الخان بدويداره
انا اهله
انا داره
انا سور القاهره كله
بمشواره
انا الشاهد على شارعي
انا شوارعي
سقيت زرعي
و لعبت الكورة بالطوبتين
ان الشطين
و انا الغرقان
انا المسطول و انا الفايق
اللي فتح بيبان الحلم
و اتدايق.

ليه؟

و الهامش احمر على يمين الصفحه كان معووج
كل الورق خلص في القراية
و كل السطور زهقت حروف
و الذكريات بتموج
في كشوف
عمرك
المستحيل
..
ليه؟

كلمة في وصفها

وحشاني بنت بحبها
حلمي استخبى في قلبها
كل افراحي اللي غرقت في البحور
ترجع لما باسمع اسمها
شفت نفسي في رسمها
ولد حزين
في اخر لوحه مضلمه
لابس بيجامه مقلمه
بيكتب قصيدة في وصفها
وردة حمرا
وحيدة
ف وسط السواد
اوحكايه
عن عشاق جداد
كلامه له فرسان شداد
بخيول
تجري
تعفر
في بلاد ارض اللغة
تبحث عن معنى صادق
او كلمه عفية
تفشل
تخجل
تعود
كل الظروف تبني سدود
بين قلبه و قلبها
الحروف معاندة
واقفه في صفها
ما قدرش يكتب
أي كلمه في وصفها.

هاكدب عليك و تصدقني

أكدب عليك
لو قلت لك
ان قلبي كراسة رسم جديدة
مستنيه ولد في اولى ابتدائي
يملاها بالشخابيط
أكدب عليك
لو قلت لك
ان الدنيا هبلة و انا ناصح
او على الأقل اني مش عبيط
أكدب عليك
لو قلت لك
صدقني